coretan 69: surat untuk sesapo yang bekonaan...

bermulanya coretan 69...

Assalamualaikum...uhuk2~ (sambil menyapu sawang2 dan debu sekitar ruang...)

Uih, lamo bona dah ghaso eh den tak menaip kek sini. Sojak duo monjak ni, sibuk boto plak. Especially eh pasal teater. Dah dokek2 nak show tu kono la prektis lobih skit. Malam2 lopeh kojo kang poie la umah si pacel tu buek prektis. Balik kang dah lotih, takdo larat nak online ko apo laie ko...membuto yo la namo eh.

Sonang cito, wiken lopeh den ngan bebudak teater den yang laen buek show kek taman budayo KL. Macam yang dah diuar2 kn sebolum nih, TTS buek 'jelajah teater' dari UTP, pehtu Taman Budayo Perak, pehtu Taman Budayo KL. Yang kek KL nih dio join venture plak ngan grup teater KL, The Qum Actors (TQA) untuk duo malam punyo performance. Eden yang secaro kebetulan prektikel kek KL ni pun lalu terlibat samo serayo memogang watak Paktam dalam teater Miao Miao Sang Arnab arahan sedaro Pacel.

Overally, den pueh ati ngan sumo bondo. Dari segi lakonan, persembahan, flow event, sambutan penonton dan sumo2 eh la. Bagi den sumo eh ok. Tapi cumo satu yo yang kurang - promosi. Promosi patut eh kono lobih laie memandangkan kito ni tak popular...kek KL. Cubo kito nengok, yang datang maso siang2 buto cumo sedaro-maro dan family terdokek. Maso malam eh plak sebaik ado rombongan KPM tang Kuantan nua ha. Kok tak hambar yo raso eh. Macam yang kawan den seorang pengkritik bebas cakap, kito memang ado buek promosi, cumo mungkin medium yang digunokan tak berapo nak berkosan.

Sebagai contoh, kito promot dalam 'buku muko' yang mano mungkin sebahagian bosar kengkawan kito dalam tu adolah budak2 engineering ataupun orang2 yang tak berapo nak minat ngan bondo nih. Jadi kok ado yang baco pun, mungkin cumo masuk mato kiri, kua mato kanan. Tak berkosan. Oleh sobab itu, untuk apo2 show lopeh2 ni, dio (pengkiritik bebas) mintak kito forward kek dio untuk dipromosi memandangkan dio ado ramai kabel dalam bidang nih. Mako eh, usoho promosi akan menjadi lobih berkosan. InsyaAllah

Tapi walau apo pun, den totap raso berbanggo menjadi sebahagian dari sebuah kumpulan yang bernamo TTS nih. Dari sini den belaja banyak bondo. Bilo den masuk kumpulan nih, bukan semato2 den dapek ilmu teater yo. Banyak laie ilmu lain yang den dapek. Ilmu agama,ilmu kemanusiaan, ilmu pengorbanan, ilmu persahabatan, ilmu percintaan dan berlambak laie ilmu2 lain. Tak nyosa den poie audition TTS ni 3 taun lopeh. Den besyukur sobab Allah bukak pintu ati dan bagi den kekuatan maso tu untuk datang ke blok b tompek audition maso tu. Walaupun den maso tu sogan gilo raso eh.

Den nak mintak maap kek sesapo yang den ado buek salah, takpun ado buek marah sepanjang den kona korang lam kumpulan neh. Kok ado yang den telopeh cakap tu, den mintak maap. Den memang telopeh, bukan sesajo. Kok sesajo pun mintak maap gak la yo. Den nak ucap tahniah kek sumo yang buek kojo. Kok ado yang tak buek kojo, rajin2 la buek lopeh ni. Boghek pikul sesamo, ghingan jinjing sesamo jugak. Golak kito sesamo, sodih pun sesamo. Jangan ponting an diri sendiri. Kok takdo kengkawan tu, ekau bukan sesapo do. Ingatla tu.

Den nak ucap timo kasih secaro personal kek cikgu teater den, Dr.Shark. Sampai mati den ingat jaso Doc. Kok satu ari sok den lupo sumo tu, den mintak doc lompang la den sekuek ati. Kecuali kok maso tu den memang ilang ingatan, takyah la lompang kuek2, bagi la gamba ko, video ko, nak tolong ingat balik...k

Sayang gilo den kek korang sumo neh. Dari yang kocik sampai yang bosa. Dari yang pendek sampai yang panjang...eh,tinggi. Dari yang gomok sampai yang kurus. Siyes den sayang korang. Jago diri leklok, jangan lupo kenangan kito sesamo. Kok satu ari kito jumpo, kau buek2 tak kona pulak, memang maso tu kompom kau kono lompang ngan den.

Mogo2 kito dapek jumpo laie kek memano, bilo2 maso. Gudbye~

Yang benar,
Pak Zam

berakhirnya coretan 69...